【搞事世界盃—餘波未了】
前日係瑞典 Midsommar 頌夏日，夜晚瑞典就要喺世界盃迎戰德國，家家戶戶唔多唔少都睇緊場波。雖然德國第一場對墨西哥比外界剷到飛起，但德國始終高瑞典幾班波，主守就一定㗎啦。點知上半場德國好似有啲力不從心，仲比瑞典竟然入咗粒！心諗唔通會偷到雞？
下半場德國換入 Gómez 後，一開波幾分鐘就嚟料追成平手。跟住德國狂攻真係攻足 45 分鐘，真係睇到好緊張刺激。瑞典都守得好好。守到賽事尾段，祈求平平安安守得和就出線 16 強在望。
世事又豈會盡如人意呢，眼見瑞典一比人攻完拎返個波就即刻咁急隊返個波上前場，但又即刻唔係比德國中場截返，就係亂射比 Neuer 沒收，然後即時又比德國再攻過，真係覺得危危乎。喺後場猜多兩腳等自己抖吓氣先呀嘛，又可以拖吓時間。都唔知佢哋係經驗不足定體育精神爆燈，總之瑞典每守完一次，就會即刻將個波交返比德國。
情況就好似日本節目《矛盾大對決》，一方攻一方守，守方瑞典就會武士道上身話：「德國，請放馬向我們進攻吧，絕對不可以留手，我們一定能守到的！」。然後瑞典守到一輪攻勢後，就會拎起個波 90 度鞠躬交比德國：「果然很強大啊！但我們是不會畏懼的，請繼續向我們進攻，拜託了！」
就喺德國發動最後一輪攻勢時，瑞典球員 Durmaz 喺禁區邊皮剷低咗對方球員，我都知瀨嘢啦今鋪，今屆咁多補時入波。果然德國就喺完場前最後一分鐘靚絕罰球處理由 Kroos 破網，將全球瑞典球迷打落十八層地獄。
事後瑞典國內網民鋪天蓋地鬧臭 Durmaz，當中仲涉及好多種族主義言論（Durmaz 係瑞典土生土長嘅移民後代），甚至恐嚇其家人，事件喺國內引起極大迴響。第二日瑞典教練拉大隊開記者會力撐 Durmaz 兼譴責種族仇恨，喺瑞典國內亦有人發起聲援 Durmaz 活動，以宏揚瑞典大愛包容嘅價值觀。
我對種族風波按下不表，因為我打咁大編嘢，其實只係想鬧 Durmaz：「我頂你個肺敗家仔，見你個勢想落腳都叫咗你唔好㗎啦，仲夠膽死喺呢個位剷？德國已經紅牌打少個，又攻足 45 分鐘都攻唔入，呢場唔贏就執定包袱，成隊人都已經壓力爆燈，臨尾急攻已經多出錯浪費機會，你就算比佢出到個波人哋都分分鐘浪射啦，加上個龍咁神勇，成隊人成場咁努力守得咁好，無啦無啦，依家乜都無啦⋯⋯」
Search